Со традиционалното осветување на водите и спуштањето на Чесниот Крст во Каменичка Река, во Македонска Каменица денес беше одбележан големиот христијански празник Богојавление – Водици.
Светиот чин на спуштањето на Чесниот Крст го изврши надлежниот архиереј, Епископот Делчевско-каменички г. Марко, во присуство на голем број верници и граѓани.
Најсреќен меѓу 16-те пријавени учесници беше Иван Јанковски, кој го извади Чесниот Крст од водите на Каменичка Река. Нему му беше честитано за храброста и благословот што го доби на овој свет ден.
Градоначалничката на Општина Македонска Каменица, Соња Стаменкова, во име на општината му подари златник како симбол на почит и признание. Покрај тоа, пригодни поклони на среќниот фаќач беа врачени и од црквата, како и од Зегин аптеки.
Празникот Водици уште еднаш го потврди заедништвото, верата и почитта кон традициите што со векови се негуваат и се пренесуваат од генерација на генерација во Македонска Каменица.
