Македонска Каменица за првпат е домаќин на завршниот турнир од Купот „Благоја Георгиевски-Буштур“ во женска конкуренција, со што градот станува центар на македонската клупска кошарка.
Ова е 34-то издание на „Фајнал-фор“ турнирот, кој ќе го даде новиот освојувач на Купот, по минатогодишниот шампион Вардар.
Во следните два дена, за трофејот ќе се натпреваруваат Крива Паланка, Бадел 1862, МЗТ Бела Вода и домаќинот Баскет Кам 2011. За првпат во историјата завршницата се игра во Македонска Каменица – град кој го има актуелниот шампион и финалист од минатото издание на Купот.
Турнирот беше официјално отворен од градоначалничката Соња Стаменкова, која на присутните екипи им посака добредојде и успешни натпревари, нагласувајќи го значењето на овој спортски настан за градот и спортската јавност.
Полуфиналните натпревари се играат во спортската сала „Кирил и Методија“. Во сабота од 15.00 часот се среќаваат Баскет Кам 2011 и МЗТ Бела Вода, додека од 17.30 часот силите ќе ги одмерат Крива Паланка и Бадел 1862.
Големото финале е закажано за 22 февруари (недела) со почеток од 18.00 часот.
Во наредните два дена, Македонска Каменица ќе живее во ритамот на кошарката.
