Денес се одбележуваат 123 години од смртта на великанот Гоце Делчев – најголемиот македонски револуционер и еден од најзначајните национални херои.
Ѓорѓи Николов Делчев, попознат како Гоце Делчев, е роден на 4 февруари 1872 година во Кукуш. Како идеолог, организатор и водач на македонското револуционерно движење, тој остави длабока и трајна трага во историјата на македонската борба за слобода и независност. Неговото име и дело се нераскинливо поврзани со стремежите за создавање слободна и самостојна Македонија.
Делчев беше еден од клучните дејци на Македонската револуционерна организација, човек со јасна визија, кој веруваше во силата на народот, единството и организираната борба. Неговата мисла дека „светот го разбира како поле за културен натпревар на народите“ и денес има силна порака и современо значење.
Неговото дело е посилно од секој удар и од секоја поделба. Идеалите за кои се бореше – слобода, правда и државност – продолжуваат да живеат и да инспирираат генерации.
Гоце Делчев трагично го загуби животот на 4 мај 1903 година во селото Баница, на пат кон Сер, но неговата борба и визија остануваат вечни.
Денес, со почит и достоинство, се потсетуваме на неговата жртва и на значењето на неговото дело.
Вечна му слава!
