Обично кога експертите зборуваат за поздрав начин на исхрана, најчесто се фокусираат на тоа што јадеме или што избегнуваме. Но, сè поголем број истражувања покажуваат дека и времето на јадење може да биде еднакво важно како и самата храна.
Во февруари, истражувачи од медицинскиот центар „Нортвестерн“ ги објавија своите резултати во научното списание „Arteriosclerosis, Thrombosis and Vascular Biology“. Тие анализирале како едноставното одредување на времето кога луѓето престануваат да јадат, како и усогласувањето на ноќниот пост со природниот циклус на спиење и будност, може да ги подобри клучните показатели за кардиоваскуларното и метаболичкото здравје – без никаква промена во внесот на калории.
Во истражувањето биле вклучени 39 доброволци на возраст од 36 до 75 години, кои имале прекумерна телесна тежина или дебелина и биле изложени на поголем ризик од кардиометаболни заболувања.
Учесниците биле поделени во две групи. Едната група следела продолжен ноќен пост, додека контролната група ги задржала вообичаените навики во исхраната и спиењето.
Клучната разлика била во тоа што од групата со продолжен пост било побарано да избегнува јадење најмалку три часа пред спиење. И двете групи, пак, ги пригушувале светлата три часа пред легнување.
По период од седум и пол недели, резултатите покажале дека учесниците кои се придржувале до продолжениот пост имале подобрување на ноќниот крвен притисок, подобар срцев ритам за време на спиењето, како и подобра контрола на шеќерот во крвта во текот на денот.
Сепак, истражувањето не покажало значително подобрување во вкупната чувствителност на инсулин – еден од клучните показатели за метаболичкото здравје.
„Усогласувањето на времето на постење со природниот ритам на будност и спиење може да ја подобри координацијата меѓу срцето, метаболизмот и сонот – системи кои заедно го штитат кардиоваскуларното здравје“, изјави Даниела Грималди, вонредна професорка по неврологија на Медицинскиот факултет „Фајнберг“.
Истражувачите посочуваат дека кај групата со продолжен пост крвниот притисок се намалил за 3,5%, а срцевиот ритам за околу 5%, што го сметаат за значаен показател за подобро кардиоваскуларно здравје.
Дополнително, учесниците покажале појасен дневно-ноќен ритам на срцето, со побрз пулс во текот на денот кога се активни – што е поврзано со подобро функционирање на кардиоваскуларниот систем.
Најважно, истражувачите нагласуваат дека учесниците се придржувале до правилата во околу 90% од времето, што покажува дека ваквиот пристап е реално изводлив за поголем дел од луѓето.
Тие додаваат дека ова може да биде едноставна, но ефективна стратегија за подобрување на кардиометаболичкото здравје.
„Не е важно само колку и што јадете, туку и кога јадете во однос на времето на спиење, бидејќи тоа има значајни физиолошки придобивки“, вели Филис Зи, коавторка на истражувањето.
