Општина Македонска Каменица објави јавен повик за прибирање барања за користење средства од општинскиот буџет за 2026 година, наменети за финансирање социјални услуги и сервиси за граѓаните. Повикот се објавува врз основа на Законот за локална самоуправа и Програмата за социјални услуги на општината за 2026 година.
Распределбата на средствата ќе се врши согласно Правилникот за начинот, критериумите и постапката за доделување финансиска поддршка, како и врз основа на критериумите утврдени во јавниот повик.
Приоритетна услуга
Средствата од буџетот за 2026 година ќе бидат наменети за финансирање на социјални услуги и сервиси за граѓаните, при што како приоритет е утврдена услугата „Помош и нега во домот“. Исплатата на средствата ќе се врши по потпишување договор и поднесено барање за исплата.
Апликантите што ќе добијат средства ќе имаат обврска, по завршување на активностите, да достават извештај за користењето на средствата до Комисијата за доделување финансиски средства за социјални услуги.
Кој има право да аплицира
Право на учество имаат здруженија – даватели на социјални услуги со седиште на територијата на општината, кои:
- се регистрирани во Централниот регистар на РСМ;
- се лиценцирани даватели на социјални услуги или имаат потврда од надлежното министерство;
- имаат активна трансакциска сметка и најмалку една година активен статус;
- дејствуваат на територијата на Општина Македонска Каменица.
Потребна документација
Апликантите треба да достават:
- тековна состојба од Централен регистар (не постара од шест месеци);
- важечка лиценца за давател на социјална услуга;
- финансиски план за реализација на услугата;
- пополнета пријава од веб-страницата на општината;
- договори за реализирани социјални услуги во изминатите две години.
Нецелосните пријави или пријавите поднесени по истекот на рокот нема да се разгледуваат.
Рок и начин на аплицирање
Рокот за поднесување на пријавите е седум дена од денот на објавувањето на повикот на веб-страницата на општината.
Документацијата може да се достави во Архивата на Општина Македонска Каменица, секој работен ден од 9 до 15 часот.
Здруженијата што ќе учествуваат во јавниот повик ќе бидат дополнително известени за резултатите од распределбата на средствата за 2026 година.
Извор:
