По неколкудневниот период на стабилно и топло време со изразени пролетни температури, од денес (понеделник, 20 април) во вечерните часови започнува значителна и нагла промена на временската состојба.
Во текот на ноќта кон вторник (20/21 април 2026 година), од север кон Македонија и поширокиот Балкански Полуостров ќе продре значително поладен воздух, кој ќе предизвика осетно опаѓање на температурите. Во споредба со вредностите кои ги имавме изминативе денови, температурите ќе се намалат за околу, а на места и за повеќе од 10 степени.
Со оваа промена, топлиот пролетен период нагло ќе биде прекинат, а времето ќе стане посвежо и променливо. Особено во утринските и вечерните часови, граѓаните ќе почувствуваат значително пониски температури.
Иако календарски сме во пролет, ваквите временски осцилации не се невообичаени за овој период од годината. Преодните сезони често носат брзи и изразени промени, па затоа се препорачува внимателност и прилагодување на облеката.
Топлата облека, очигледно, сè уште нема да оди во плакар – напротив, повторно ќе ни биде потребна во деновите што следуваат.
Останува да се следат понатамошните прогнози, бидејќи ваквите продори на студен воздух често носат и нестабилност, врнежи и дополнителни временски промени.
