Кога станува збор за слабеењето, многумина се фокусираат на големите работи – диети, вежбање и строги режими на исхрана. Сепак, често се заборава дека „ѓаволот е во деталите“, а токму тие мали детали можат сериозно да го попречат патот до витка фигура.
Благодарение на интернетот, денес лесно можеме да најдеме совети од нутриционисти и фитнес експерти. Но, во исто време, никогаш не било полесно да се дојде до брза храна, високо преработени производи или достава на храна директно до нашата врата. Затоа слабеењето денес е и полесно, но и потешко.
Речиси секој од нас, без разлика на возраста, зад себе има барем неколку обиди да ослаби неколку килограми – некои успешни, а некои не.
Најчестата грешка
Една од најчестите грешки е тоа што не ги броиме сите калории. Многумина ги проверуваат декларациите на производите, користат апликации или се обидуваат да пресметаат колку калории внесуваат. Но, често се заборава дека и пијалаците содржат калории.
Таканаречените течни калории доаѓаат од алкохол, сокови, кафе со додатоци, енергетски пијалаци и други напитоци. На пример, мало шише сок од 500 милилитри може да содржи и до 150–200 калории – речиси колку мала ужина. Ако на тоа се додаде и кафе со млеко и шеќер, можно е целиот калориски дефицит да се „испие“.
Пијалаци со најмногу калории
Газирани сокови Една чаша од околу 250 милилитри газиран сок може да има 100–110 калории. Лименка од 330 милилитри често содржи повеќе од 30 грама шеќер.
Кафе со млеко и шеќер Црното кафе има речиси нула калории, но кога се додаваат млеко и шеќер, калориската вредност може да достигне од 60 до 120 калории.
Капучино или лате Популарните напитоци од кафулињата можат да имаат 80–150 калории, особено ако се подготвени со полномасно млеко.
Купечки овошни сокови Иако се сметаат за здрави, индустриските овошни сокови се богати со шеќери. Чаша од 250 милилитри обично има околу 100–120 калории.
Енергетски пијалаци Лименка од 250 милилитри содржи околу 110–120 калории, а поголемите пакувања имаат и значително повеќе.
Милкшејк Милкшејковите се меѓу најкалоричните пијалаци и можат да содржат од 300 до 500 калории по порција.
Ледено кафе со сирупи и шлаг Овие популарни напитоци често содржат од 250 до 400 калории по шолја.
Закуските често ги забораваме
Друга честа грешка е тоа што ги броиме калориите од главните оброци, но не и од закуските. Кога сме гладни, често мислиме дека ќе каснеме „само малку“, но тоа лесно се претвора во повеќе мали грицки во текот на денот.
На пример, неколку бадеми можат да имаат и до 150 калории. Ако на тоа се додадат јогурт, парче леб или други мали ужини, многу лесно може да се надмине дневниот внес на калории.
Совет
Ако се обидувате да ослабнете, обидете се неколку дена да запишувате сè што јадете и пиете. Така најлесно ќе откриете колку калории се „кријат“ во пијалаците и малите закуски.
Водата, незасладениот чај или црното кафе се едни од најдобрите избори ако сакате да го намалите внесот на калории преку пијалаци, а планирањето на закуските може да помогне да се избегне безумно грицкање во текот на денот.
