Целата седмица која ни претстои во Македонија ќе помине во знакот на значително натпросечни температури за овој период од годината. Нашето подрачје ќе биде под влијание на стабилна, сува и значително потопла воздушна маса која ќе пристигнува од југ, условувајќи многу повеќе сончеви периоди и претежно суво време.
Температурите ќе бележат постепен пораст, а особено топло ќе биде во Повардарието и во југоисточните предели од земјата, каде што максималните дневни температури во текот на седмицата ќе се искачуваат до, па и близу 20 степени Целзиусови. Ова значи дека времето ќе има изразено пролетен карактер, невообичаен за крајот на февруари.
Натпросечно топло време не ја очекува само Македонија, туку и најголем дел од Европскиот континент и целиот Балкан. Ваквата временска состојба доаѓа по подолг период на врнежливо и многу нестабилно време, носејќи конечно стабилизација и пријатни услови за активности на отворено.
Утрите на повеќе места ќе бидат посвежи, со можност за појава на магла по котлините, но во текот на денот ќе преовладува сончево и топло време, со слаб до умерен ветер.
Уживајте во пролетното време во февруари кое нè очекува во последната седмица од месецот.
