Нова научна студија носи надеж во борбата против смртоносните каснувања од отровни змии. Истражувачи од Универзитетот во Мериленд развиле нов пристап за неутрализирање на змискиот отров, користејќи природни протеини што самите змии ги развиле низ еволуцијата за да се заштитат од сопствениот отров.
Научниот тим, предводен од професорот по биологија Шон Б. Керол, открил дека одредени комбинации на протеини од крвта на западната дијамантска ѕвечарка имаат исклучителна способност да ги блокираат токсините на повеќе видови отровни змии.
Според истражувачите, ова откритие би можело да биде основа за развој на нова генерација противотрови кои би биле значително поефикасни од сегашните препарати.
„Ова е една од оние ситуации во кои природата веќе го решила проблемот со кој науката се обидува да се справи со децении“, изјавил професорот Керол.
Каснувањата од отровни змии и понатаму претставуваат сериозен здравствен проблем во многу делови од светот. Според проценките на Светската здравствена организација, секоја година меѓу 80.000 и 140.000 луѓе умираат како последица на змиски каснувања, а стотици илјади остануваат со трајни последици.
Постојните противотрови се произведуваат со инјектирање змиски отров кај големи животни, најчесто коњи, по што од нивната крв се издвојуваат антителата. Овој процес е скап, а ефикасноста на препаратите може да варира и не секогаш обезбедува заштита од различни видови змиски отров. Дополнително, кај некои пациенти можат да се појават сериозни имунолошки реакции.
Истражувањето се надоврзува на откритие од 2022 година, кога научниците идентификувале протеин наречен ФЕТУА-3, кој успешно ги блокира токсините од групата металопротеинази во отровот на западната дијамантска ѕвечарка, а покажал ефикасност и против отровот на други видови ѕвечарки.
Научниците сметаат дека искористувањето на природните заштитни механизми што ги поседуваат самите змии може да доведе до создавање побезбедни, поефикасни и подостапни противотрови во иднина.
