Заврши четвртата и последна сесија на Проектниот форум во Македонска Каменица, на која граѓаните преку гласање и бодување одлучуваа за три предлог-проекти.
Најмногу поени доби предлог-проектот „ЕКО пазар во Македонска Каменица“ – 20 поени. „Училишен кампус“ доби 18 поени, додека „Музеј на рударство“ доби 10 поени.
Предлог-проектите имаат наведени буџети од 23.000 американски долари за ЕКО пазарот, 30.000 долари за Училишниот кампус и 18.000 долари за Музејот на рударство.
Од граѓаните и 10 препораки до Општината
Со завршувањето на четирите форумски сесии, од учесниците произлегоа и 10 препораки упатени до Општина Македонска Каменица:
Отворање на Младински центар
Реконструкција на трпезарија и поставување на настрешница на Грчки гробишта
Изградба на мост за возила на горна Каменичка Река
Реконструкција на кејот на Каменичка река
Изградба на тротоари на ул. Церска
Поставување на куќички за бездомници
Уредување на постоечката теретана
Поставување контејнери за рециклирање и селекција на отпад и воведување компостери за органски отпад
Реконструкција на водоводот во Стара Каменица и во Дулица
Езерски туризам – уредување на пешачка патека на Калиманско Езеро
Препораките се резултат на учеството на жителите во четирите форумски сесии и се доставени до градоначалникот, Советот на Општина Македонска Каменица и општинската администрација.
Проектниот форум се реализира во рамките на проектот „Зајакнување на општинските совети – Фаза 2“, со грант-фонд од 30.000 американски долари.
Проектот се спроведува во соработка со УНДП, со поддршка од Швајцарската влада и Министерството за локална самоуправа.
