Новата детска хит претстава „Приказните на Далматинко“ во изведба на Театар Хит донесе многу насмевки, радост и силни пораки за најмладите во Македонска Каменица.
Во салата на Домот на културата, а во организација на КИЦ „Романса“, беа реализирани две успешни изведби кои ја воодушевија детската публика. Децата уживаа во дружењето со главниот лик Далматинко и неговото другарче Зајче Трајче, исполнето со хумор, песна, интеракција и едукативни содржини.
Претставата испрати низа важни пораки до најмладите – дека другарството е најважно, да се читаат повеќе книги, помалку време да се поминува на мобилни телефони, да се сака и чува природата, да се почитуваат животните и секогаш да се помага на другите.
Авторот, режисер и актер во главната улога, Сашо Ристовски, истакна дека „Приказните на Далматинко“ е оригинална претстава со посебен актерски и визуелен пристап, создадена да биде блиска до детската публика и да понуди силна едукативна и педагошка вредност.
Тој најави дека со оваа претстава започнуваат и нови активности во рамки на проектот „Летен театарски караван – среќни деца, среќна општина 2026“, кој ќе се реализира во соработка со повеќе општини низ државата, во продукција на Театар Хит Скопје.
