Пчеларското здружение „Еко Кам Мед“ од Македонска Каменица го одбележа патрониот празник Св. Харалампиј, заштитник на пчеларите и пчелните семејства, со традиционална програма посветена на пчеларството и природата.
На почетокот на денот, присутните се соборија пред храмот „Успение на Пресвета Богородица“ за Света литургија, упатувајќи молитви за здравје, бериќет и успешна пчеларска година.
Како дел од активностите, кај Рудник САСА беа засадени 500 нови садници, со што се истакна посветеноста на здружението и локалната заедница кон заштитата на животната средина и унапредувањето на условите за пчеларството.
На настанот присуствуваше и градоначалничката Соња Стаменкова, која во поздравниот говор ја потенцира важноста на пчеларството за локалната економија и како чувар на биодиверзитетот. Таа потврди дека општината ќе продолжи да ја поддржува секоја иницијатива што промовира одржлив развој, заштита на природата и зачувување на традицијата.
По засадувањето на садниците, Рудник САСА донираше медоносни садници за сите членови на здружението, со цел дополнително зајакнување на медоносниот фонд и создавање подобри услови за развој на пчелните семејства.
Со оваа активност, пчеларите од Македонска Каменица уште еднаш ја потврдија својата посветеност кон природата, заедницата и долготрајната пчеларска традиција во регионот.
