Врвниот македонски продуцент и диџеј ГАЛОСКИ ќе настапи на овогодинешниот Ден на дијаспората во Македонска Каменица, кој ќе се одржи на 9 август на главната градска улица „Александар Македонски“.
Организаторите најавуваат дека неговото гостување е реализирано на барање на помладите генерации, а токму ГАЛОСКИ ќе биде задолжен за финалното аудио-визуелно шоу кое ќе го затвори повеќечасовниот настан.
ГАЛОСКИ е еден од најпознатите македонски артисти на електронската сцена. Тој снима за издавачката куќа на Dimitri Vegas & Like Mike, а неговите изданија добиваат поддршка од светски познати имиња како David Guetta, Tiësto, Armin van Buuren, Martin Garrix, Solomun, Swedish House Mafia, Steve Angello и Sebastian Ingrosso.
Ова ќе биде негово прво гостување во Македонска Каменица.
Денот на дијаспората годинава ќе понуди повеќе од шест часа програма со содржини за сите генерации, меѓу кои детска програма, фолклорни настапи, видео пораки од иселениците, презентација на инвестициските можности и развојните приоритети на Општина Македонска Каменица, како и богата музичка програма.
Со настапот на ГАЛОСКИ, организаторите најавуваат впечатливо финале и уште едно незаборавно издание на Денот на дијаспората.
