Македонија влегува во период на изразито студено, нестабилно и ветровито време под влијание на силен продор на арктички воздух од север. Според метеоролошките најави, следува нагло заладување, проследено со врнежи, силен северен ветер и значителен пад на температурите.
Во почетната фаза се очекуваат мешани врнежи од дожд и снег во пониските места, додека на планините врнежите ќе бидат исклучиво од снег. Во западните делови од земјата постои зголемен ризик од појава на ледени врнежи и голомразица, што може да создаде опасни услови на патиштата.
Од ноќта сабота кон недела, како и во текот на недела и понеделник (11 и 12 јануари), врнежите ќе преминат во снег и во поголемиот дел од градовите. На планините и скијачките центри се очекува формирање на нов снежен покривач од 30 до 40 сантиметри.
Температурите ќе бележат драстичен пад. Дневните температури ќе остануваат под нулата, додека утринските ќе се спуштаат до -10°C, локално и под -15°C. На планините се прогнозираат екстремно ниски температури, и до -20°C.
Надлежните институции апелираат на зголемена внимателност, особено во сообраќајот, како и на соодветна заштита од екстремниот студ.
